حضرت رحمہ اللہ کی تربیت کا نرالا انداز
تہجد کا وقت ہوچکا تھا تبھی سفید لباس میں نہایت عمدہ صدری پہنے ہوئے قاری جوہر نیازی رحمانی مصلی کی طرف امامت کے لیے بڑھے. مجھے اپنا زمانہ یاد آگیا. ایک وقت تھا کہ جب ہم دونوں مل کر چار چار رکعت تہجد کی نماز پڑھایا کرتے تھے. حضرت رحمہ اللہ مجھے بطور مشق اور تربیت کے لیے مجھے تہجد کی نماز میں کھڑا کرا دیتے. شروع شروع میں تو میرے پیر لڑکھڑاتے رہے لیکن بعد میں یہ ڈر دل سے نکل گیا اور آج الحمدللہ حضرت کی دعا اور تربیت کا نتیجہ ہے کہ نہ صرف بڑی سی بڑی مسجد میں کھڑے ہونے سے ڈر لگتا ہے بلکہ بڑے سے بڑا مجمع میں بھی بلا خوف قرآن مجید سنانے کا شرف حاصل ہوتا رہتا ہے. مجھے وہ دن بھی یاد ہے جب میں بالکل چھوٹا تھا اور صرف پارہ عم حفظ کیا تھا. ابو کی خواہش سے حضرت کو عصر کے بعد کبھی کبھی قرآن مجید سنایا کرتا اور حضرت میرے حوصلے کو بڑھانے کے لیے بخوشی سنتے. جبکہ معمول یہ ہے کہ عصر کے بعد قرآن مجید وہ حافظ صاحب سناتے ہیں جن کو خانقاہ رحمانی کی مسجد میں تراویح سنانی ہوتی ہے اور یہ خدمت جامعہ رحمانی کے استاد حافظ مولانا اکرام صاحب 1999 سے اب تک انجام دے رہے ہیں. آنجناب سے پہلے جامعہ رحمانی کے سب سے بزرگ استاد حافظ رضی احمد صاحب تراویح سنایا کرتے تھے(فی الوقت حافظ صاحب جامعہ رحمانی کے اساتذہ میں سب سے سینئر ہیں اللہ تعالیٰ ان کے عمر کو دراز فرمائے). عصر کی محفل میں سماعت قرآن کے بعد جن حضرات کو کسی طرح کا کوئی مسئلہ دریافت کرنا ہوتا تو وہ بھرے مجلس میں سوال کرتا اور حضرت مدلل جواب مرحمت فرماتے. یہ سلسلہ موجودہ امیر شریعت حضرت مولانا احمد ولی فیصل رحمانی صاحب نے بھی قائم کر رکھی ہے. حضرت رحمہ اللہ کی تربیت کا ایک واقعہ یہاں ذکر کرنا بہتر سمجھتا ہوں کہ بچوں کی تربیت کے تئیں کس قدر بیدار تھے. خانقاہ رحمانی سے متصل محلے کے بچے آخر عشرہ میں بڑی تعداد میں افطار کے لیے آجاتے تھے. ان میں بہت سارے بچے ایسے بھی ہوتے تھے کہ ان کے سر پر نہ ٹوپی ہے اور نہ ہی پیر پر چپل تو آپ نے ان کی تربیت اور دینی ماحول پیدا کرنے کے لیے ایک نعرہ دیا تھا " سر پر ٹوپی، پیر پر چپل مسجد چلو مسجد چلو" اور اس کے ذمہ دار جناب فضل رحمان رحمانی کو بنایا تھا جو آج کل فکر و نظر آفیشل ٹی وی چینل کے چیف ایڈیٹر اور جامعہ رحمانی کے شعبہ صحافت کے صدر ہیں. ان میں جو بچہ کلمہ طیبہ یا دوسرے کلمے، استغفار اور درود شریف وغیرہ یاد کرلیتا تو ان کو حضرت خود بلاتے اور بڑے پیار سے ان سے سنتے اور پھر اس کو بطور انعام ایک سیب عنایت فرماتے. اس طرح بچوں کی تربیت فرماتے کہ بچوں میں خود ایک شوق پیدا ہوجائے. مجھے بھی بطور تربیت تہجد کے لیے یا کبھی کبھی نماز کے لیے آگے بڑھا دیتے تھے جبکہ باضابطہ طور پر تو حافظ خالد کے بعد 2004 میں حضرت رحمہ اللہ نے تہجد پڑھانے کی ذمہ داری قاری جوہر کو دی تھی. اس وقت سے لے کر آج تک قاری جوہر صاحب ہی اس ذمہ داری کو بخوبی انجام دے رہے ہیں. موصوف خوش الحان قاری کے ساتھ باصلاحیت عالم دین ہیں. قاری صاحب نے آج کے تہجد میں سورہ حجرات سے سورہ ذاریات تک بہت عمدہ انداز میں تلاوت کی. تہجد پڑھ کر ایک روحانی غذا حاصل ہوئی

چائے کی پیالی
تہجد کے بعد سحری تیار تھا معتکفین لگے ہوئے دسترخوان پر تشریف لائے اور سحری تناول فرماکر چائے نوش فرمائی. میری نگاہ بھی چائے کی پیالی پر پڑی تبھی یاد داشتوں کے خانوں سے مجھے وہ وقت یاد آگیا جب میں چھوٹا ہوتا تھا اور ابو مجھ سے کہتے کہ چائے کی پیالی جہاں جہاں بکھری پڑی ہے سب کو اکٹھا کرو اور میں بس چائے کی پیالی ڈھونڈنے نکل پڑتا کبھی کسی کے سرہانے پر تو کبھی کسی کونے میں رکھی پیالی ملتی اور میں خوشی خوشی اسے لے کر باہر آتا گویا میں نے کوئی کھوئی ہوئی چیز حاصل کر لی. اس کے بعد میں اور میرے ساتھ کچھ بھائی حوض کے پاس لے جاکر دھوتے اس دھونے کے دوران کبھی پیالی بھی ٹوٹ جاتی تو ہم لوگ ٹوٹی ہوئی پیالی کو جلدی جلدی چھپانے کے درپے ہوتے کہ کہیں ڈانٹ نہ پڑے. چائے پلانے کی ذمہ داری میرے والد محترم حاجی محمد صلاح الدین تقریباً تیس سال سے انجام دے رہے ہیں. میں نے اپنے زمانہ طفلی سے انہیں اس ذمہ داری کو بخوشی انجام دیتے ہوئے دیکھا ہے. حالانکہ اس طویل مدت میں کئی بار پریشانی آئی. کبھی کوئی چائے بنانے والے نہیں ملے تو کبھی اچانک دودھ خراب ہوگیا. بیس پچیس سال قبل دودھ کی اتنی فراوانی یا پیکٹ میں دودھ دستیاب نہیں ہوا کرتا تھا جس سے والد صاحب پریشان ہوجاتے کہ اب کیسے معتکفین کو چائے پلائی جائے گی اور کبھی کبھی تو مالی حالات ٹھیک نہیں رہے لیکن اس کے باوجود انہوں نے ہمت کبھی نہیں ہاری. ہمت مرداں مدد خدا کے مصداق پر اللہ تعالیٰ نے اس سلسلہ کو آج تک باقی رکھا ہے. دعا گو ہوں کہ والد صاحب کی اس خدمت کو شرف قبولیت بخشے۔ آمین

کرونا کال (لاک ڈاؤن مارچ 2019)
میرے یادداشت کے مطابق مسجد رحمانی کی ایک خاصیت یہ بھی رہی کہ اخیر عشرہ میں معتکفین سے کبھی مسجد خالی نہیں رہی ہے. کرونا جیسے کال میں جب پوری دنیا اپنے گھر میں قید ہوگئی تھی اور مسجدوں کے دروازے بند ہوگئے تھے اس وقت بھی یہ مسجد آباد تھی. میرے والد صاحب فرماتے ہیں کہ 2020 میں صرف میرے پیر و مرشد حضرت مولانا ولی صاحب اور احقر (حاجی محمد صلاح الدین رحمانی) نے اعتکاف کیا. یعنی پوری مسجد میں صرف ہم دونوں ہی تھے. اسی سال حضرت نے لاک ڈاؤن کا فائدہ اٹھاتے ہوئے پوری مسجد کی مرمت کرائی اور رنگ روغن کرکے نئے سرے سے مسجد کو چمکایا، پوری مسجد میں بجلی کا کام کراکر جہاں جہاں لائٹ یا پنکھے کی ضرورت تھی اسے لگوایا. ہم لوگ تو یہ سمجھ رہے تھے کہ حضرت مسجد کا کام کر رہے ہیں لیکن بندہ خدا کو آگاہی ہوچکی تھی کہ اب جانے کا وقت آچکا ہے اسلیے وہ بظاہر اللہ کے گھر کی تعمیر کر رہے تھے لیکن در اصل اپنے لیے گھر جہاں ہمیشہ ہمیش رہنا ہے اس کی تیاری کر رہے تھے اور وہاں کے لیے گھر بنا رہے تھے. کیونکہ حدیث پاک میں آتا ہے "من بنی للہ مسجدا بنی اللہ لہ بیتا فی الجنہ" جس نے اللہ کے لیے گھر بنایا، اللہ تعالیٰ اس کے لیے جنت میں گھر بنا تے ہیں


انتقال پر ملال
جب مسجد کا کام مکمل ہوگیا تو اس کے اگلے سال ہی حضرت 3 اپریل 2021 کو حقیقی مالک مسجد سے جاملے. انا للہ وانا الیہ راجعون. آنحضرت صلی اللہ علیہ وسلم کے وصال کے بعد تمام صحابہ کرام رضی اللہ عنہم اس قدر رنجیدہ ہوئے کہ اپنے ہوش وحواس کھوبیٹھے، یہاں تک کہ سیدنا عمرفاروق رضی اللہ عنہ جیسے مضبوط قوت و جسم کے مالک اور بہادر بھی اس اعلان سے اس قدر متاثر ہوئے کہ ہاتھ میں بے نیام تلوار لے کر یہ کہنے لگے کہ جس شخص کو میں نے یہ کہتے ہوئے سن لیا کہ آپ صلی اللہ علیہ وسلم وفات پاگئے ہیں تو میں اس کا سر قلم کر دوں گا۔لیکن اس موقع پر حضرت ابوبکر صدیق اکبر رضی اللہ عنہ نے تمام صحابہ کرام رضی اللہ عنہم کو جمع کر کے وہ تاریخی خطبہ ارشاد فرمایا جو تمام امت مسلمہ کے بڑے سے بڑا غم کو ہلکہ کرنے لے کافی ہے. آپ نے کہا: ’’لوگو! سنو! جو لوگ تم میں سے آپ صلی اللہ علیہ وسلم کی عبادت کیا کرتے تھے توآپ صلی اللہ علیہ وسلم وفات پاگئے ہیں اورجولوگ اللہ پاک کی عبادت کرتے تھے تو یاد رکھو! اللہ زندہ ہے اور اللہ کی ذات کو کبھی موت نہیں آئے گی۔‘‘ "اللہ لا الہ الا ہو الحی القیوم"(الآیت). مفکر اسلام حضرت مولانا ولی رحمانی کے انتقال پر بھی امت مسلمہ کا یہی حال تھا. آپ نے ہر مشکل وقت میں امت کی رہنمائی کی تھی. شریعت اسلامی کی حفاظت کے لیے حکومت وقت کے خلاف ہمیشہ سینہ سپر رہے. اب وہ شیر دل انسان، بے پناہ صلاحیتوں کے مالک اور ہر نازک وقت میں حکمت و دانائی سے فیصلہ کرنے والے، ہم سب کو چھوڑ کر جا چکے تھے. کرونا جیسے پروٹوکول میں بھی لاکھوں کی تعداد میں نہ صرف بہار سے بلکہ جھاڑ کھنڈ سے، بنگال سے، اتر پردیش سے، مہاراشٹر سے حضرت مولانا عمرین محفوظ رحمانی صاحب اور دہلی سے میں خود اور میرے ساتھ کئی سارے احباب جن میں حضرت مولانا محمد شمشاد رحمانی اور میرے خسر جناب محمد مفیض عالم وغیرہ نے جنازہ میں شرکت کی اور شہر مونگیر انسانوں کے جم غفیر سے جام ہوگیا. یہ حضرت مولانا ولی رحمانی صاحب سے عقیدت و محبت تھی. لیکن ایسے وقت میں بھی محبین نے حضرت ابو بکر صدیق کے اسی تاریخی قول کو یاد رکھ کر سن 2021 میں بھی میرے والد اور مولانا ماسٹر مشیر الدین رحمانی، سپریڈنٹ اقلیتی ہوسٹل مونگیر نے مسجد رحمانی میں اعتکاف کیا. اتفاق دیکھیے کہ کرونا کے دونوں سال صرف دو دو آدمی ہی رہیں اور دونوں میں میرے والد صاحب شریک رہیں. اس لیے میں خدا کا شکر کرتے ہوئے کہہ سکتا ہوں کہ والد محترم جناب محمد صلاح الدین 1992 سے بلا ناغہ آج (2025) تک اعتکاف کرتے آرہے ہیں. میں خانقاہ رحمانی کی مسجد میں تھا اور طلوع صادق کا سنہرا وقت، اسی لیے یادوں کے دریچے کھلتے جا رہے تھے اور حضرت رحمہ اللہ کے ساتھ اعتکاف میں بتائے ہوئے ایک ایک پل میرے ذہن میں گردش کر رہا تھا. ان کی یادیں مجھے پریشان کر رہی تھی. چونکہ آج میرے سامنے خانقاہ رحمانی کی وہی مسجد، وہی مصلی، وہی حوض اور وہی در و دیوار موجود تھی لیکن آج ہمارے روحانی دادا جنہیں ہم دادا ہی کہا کرتے تھے، ہم سبھوں کے پیر و مرشد، خانقاہ رحمانی کے سجادہ نشین اور لاکھوں لوگوں کے مربی، سیکڑوں کی تعداد میں آئے ہوئے معتکفین کے مصلح حضرت مولانا محمد ولی رحمانی امیر شریعت سابع اب موجود نہیں تھے. ان کی بس یادیں ہی یادیں تھیں جو میرے ٹوٹے ہوئے دل کو تسکین دے رہی تھی کہ وہ آج ہمارے درمیان نہیں ہیں لیکن ان کی یادوں کو تازگی بخشنے کیلئے اور ان کے چھوڑے ہوئے نقوش کو آگے بڑھانے کیلئے آپ کے فرزند ارجمند ہم سبھوں کے مرشد و مربی خانقاہ رحمانی کے سجادہ نشیں مفکر ملت امیر شریعت حضرت مولانا سید احمد ولی فیصل رحمانی صاحب دامت برکاتہم خانقاہ رحمانی کو اپنے اسلاف کے چھوڑے ہوئے نقوش پر لے کر آگے کی طرف بڑھ رہے ہیں، اور موجودہ دور میں ہم سبھوں کیلئے راہنما اور قائد کی حیثیت رکھتے ہیں ۔ اللہ تعالیٰ اس خانقاہ رحمانی اور یہاں کے بزرگان دین کے فیوض و برکات سے ہم سبھوں کو مالا مال فرمائے اور رمضان کے بابرکت مہینے میں ہم سبھوں کی مغفرت فرمائے اور امت مسلمہ کو ہر طرح کے شرور و فتن اور ناپاک سازشوں سے محفوظ رکھے آمین. ایں دعا از من و جملہ جہاں آمین باد